مشاكل الشعر وحلولها (موسوعه كامله).................

بسم الله الرحمن الرحيم

مين مننا ماتحلمش إن شعرها يبقى زي شعر البنات اللي في إعلانات الشامبو....

وعلشان الحلم ده يتحقق فأول خطواتك لازم تعرفي شعرك. وأول خطوات المعرفة هي ازاي بيتكون الشعر نوع الشعر..

تكوين الشعر

لازم تعرفي إن الشعرة تتكون من جزأين أساسيين هما:

1. جذر الشعر

وده بيكون مزروع داخل الجلد في جيب شعري دهني، وفي قاعدته بتوجد بصيلة الشعر اللي تعد الجزء الحي من الشعرة التي تتتغذى عبر الأوعية الدموية، ولكل جذر غدة دهنية بتفرز مادة بتقوم بترطيب الشعر وإحاطته بغلاف رقيق لحمايته.

2. ساق الشعر

وده الجزء البارز من الشعرة، وبيتألف من حزمة ألياف لينة بتحيط بها طبقة قرنية واقية، وبتتأثر الطبقة دي بالمؤثرات الخارجية، زي الغسيل والشامبو وأدوات التجفيف وصبغات الشعر كمان. والطبقة القرنية دي بتتكون من مادة بروتينية تعرف بـ"الكيراتين" بتفرزها خلايا موجودة داخل بصيلة الشعر.

تركيب فروة الرأس

ودي طبعا لازم تفهمي تكوينها هي كمان لأنها الوعاء اللي موجود فيه الشعر، بتتكون فروة الرأس من طبقة جلدية سميكة بتحتوي على العديد من البصيلات الشعرية بالإضافة للغدد الجلدية والدهنية اللي بتفرز طبقة دهنية بتدي الشعر لمعانه، وتتمتع فروة الرأس بشبكة غزيرة من الأوعية الدموية اللي بتوصل الغذا والأكسجين لبصيلات الشعر والغدد المحيطة به.

آخر حاجة مفروض تعرفيها إن عدد الشعر في الجسم عامة حوالي 5 مليون شعرة منها مليون بس في شعر الرأس والوجه. ودلوقتي بقى نروح نعرف أنواع الشعر.

أنواع الشعر

طبعا كلكم عارفين إن الشعر بيتقسم لـ3 أنواع، العادي والدهني والجاف ولكل نوع من دول مزاياه وعيوبه... ونبدأ بالعادي..

الشعر العادي

النوع ده من الشعر بيحاط بطبقة معتدلة من الدهون -يعني لا دهون كتيرة ولا دهون قليلة- علشان كده هو سهل في العناية بيه يعني مش محتاج لمجهود كبير منك، لكن خلي بالك لو أهملتيه ممكن يتحول لشعر دهني ولو زودتِ العناية بيه عن اللازم ممكن يتحول لجاف... ماتندهشيش؛ أصلك لو ما غسلتيهوش واهتميتِ بيه بالمستحضرات الخاصة بيه ممكن نسبة الدهون تزيد فيه وتحوله لدهني ولو اهتميتِ بيه زيادة عن اللزوم وخاصة بغسله ممكن يبطل إفراز الدهون بتاعته وبالتالي يتحول لجاف.

الشعر الجاف

كتير بيفتكروا إن الشعر الجاف مافيهوش غدد دهنية وده مش صح.. هو فيه بس بكميات محدودة وكمان نشاطها في إفراز الدهون محدود، وده بيؤدي لعدم وصول قدر كافٍ من الزيوت للشعر وعلشان كده بيبقى جاف، وبيكاد يخلو الشعر الجاف من قشر الشعر، ودي تقريبا هي ميزته الوحيدة. والعناية بالشعر الجاف بتكمن في إمداده دايما بالزيوت الطبيعية .

الشعر الدهني

بتلاقي فى الشعر الدهني إن فروة الرأس فيها زيادة شوية في إفراز الدهون نتيجة لزيادة نشاط الغدد الدهنية فيهاـ وغالبا ما بتلاقي فى الشعر ده نسبة عالية من قشر الشعرـ وعيب الشعر ده الأساسي إنه سريع التعرض للاتساخ علشان كده بيحتاج منك إلى عناية مستمرة.

قشر الشعر

إيه هو قشر الشعر؟

طبعا قبل ما نعرف سبب الحاجة إيه أو ازاي إننا نقضي عليها، محتاجين إننا نتعرف عليها الأول ونعرف إيه هي.. قشر الشعر بيسمى علميا باسم (التهاب الجلد الزهمي) وهو عبارة عن قشور بيضاء أو صفراء من الجلد الميت وإصابتها بتسبب حدوث هرش مستمر في فروة الرأس.

وأحيانا بيكتر هذا القشر لدرجة إنه يمتد إلى الحواجب والرموش والأذنين والأنف والرقبة وممكن إنه يسبب احمراراً بالجلد في هذه الأماكن. كمان لازم تعرفي حاجة مهمة قوي وهي إن فروة الرأس دي زيها زي باقي جلد الجسم بتتخلص دائماً من الخلايا الميتة وتستبدلها بغيرها من الخلايا الجديدة، وفي العملية دي بيبقى الجلد محتفظ بمظهره العادي، ولكن لما العملية دي تزيد شوية بطريقة شاذة يظهر قشر الشعر.

أنواع قشر الشعر

فيه نوعين لقشر الشعر:

النوع الأول: وبيسمى القشرة الجافة وبيكون على شكل قشيرات بيضاء متناثرة على جلد الرأس.

النوع الثاني: وبيسمى القشرة الدهنية وهو ناتج عن زيادة إفرازات المواد الدهنية في فروة الرأس والنوع ده بيكون محتاج للعلاج لأن القشور دي بيبقى صعب قوي إزالتها.

بتختلف أسباب الإصابة بقشر الشعر من شخص إلى الآخر بس، على العموم ممكن نقول إن السبب قد يرجع إلى أحد أو مجموعة العوامل الإتية:

1- الإصراف في تسريح الشعر زيادة عن اللزوم خاصة إذا كان التسريح ده بيتم بعنف، لأن بكده بتحكّي فروة الرأس بشدة وبالتالي بتساعديها على إنها تفرز القشور.

2- زيادة إفراز الدهون بفروة الرأس اللي بيكون بسبب نشاط الغدد الدهنية الموجود بها وهذه الزيادة قد يكون سببها نفسي نتيجة التعرض لضغط عصبي.

3- الإفراط في استخدام السشوار على الفاضي والمليان وده لأن كتر استخدام السشوار قد يكون سببا في جعل الشعر وفروة الرأس ضعيفة قوي وبالتالي الإصابة بقشر الشعر.

4 – الإفراط في استخدام كريمات الشعر والجيل لأن المواد دي كلها بتلتصق في الشعر وبالتالي بتقوم بإزالة الطبقة العازلة الموجودة وبالتالي بيسهل الإصابة بقشر الشعر نتيجة عدم الرعاية والاهتمام.

5- التقلبات الجوية ممكن كمان إنها تؤدي إلى قشر الشعر علشان كده بتلاقي إن قشر الشعر بيكتر في فصل الشتاء، وده بسبب إن الشعر في الفترة دي بيتأثر بجفاف الجو وبيكون هو كمان جاف.. وبكده بتكون الفرصة مناسبة لقشر الشعر.

فيه كام نصيحة كده ممكن إنك تحاولي إنك تعمليها علشان تتخلصي نهائيا من قشر الشعر، وتتجنبي الإصابة به نهائيا وهي:

1- احرصي على تدليك فروة الرأس قبل النوم بكمية كافية من زيت الزيتون أو زيت اللوز أو زيت الصبار، وبعد كده لفي شعرك وفي الصباح اغسليه بالماء الدافئ. حاولي إنك تكرري هذه العملية يوميا لغاية ما تلاقي إن القشرة بدأت تنتهي تماما.

2- ياريت إنك تتجنبي تماما الإيشاربات المصنوعة من مادة النايلون أو البوليستر لأن النوع ده من الأقشمة ممكن يؤدي لظهور بعض أنواع من الحساسية في فروة الرأس أو تكوين طبقة سميكة من القشرة على فروة الرأس أو قد تصيبك -لا قدر الله- بنحول الشعر خاصة لو كان شعرك بيتميز إنه خفيف من الأمام. علشان كده لو محجبة ياريت إنك تلبسي الحجاب المصنوع من الأقمشة القطنية..

3- في بعض الصيدليات بيوجد غسول طبي بيحتوي على مادة الكبريت اللي ممكن إنك تتدلكي بيها الشعر ثم يغسل بعدها بشامبو مخصوص للقشر، وهو متوافر بالصيدليات أيضا.. ويكرر استخدام هذا الغسول مرة كل أسبوع حتى تتخلصي من القشر نهائيا.

4- استخدمي نوع شامبو مناسب لنوع شعرك وضد القشرة بس خلّي بالك إنك تشطفي شعرك بالراحة في كل مرة تغسليه فيها علشان لو شطفتيه بعنف ممكن إنك بكده تزودي في إفراز القشرة.

5- ياريت تتجنبي استخدام السشوار على الفاضي والمليان خاصة في الفترة اللي بيكون فيها شعرك جاف وفيه قشرة كتير، لأن ده ممكن إنه يخلي فروة شعرك أضعف؛ علشان كده ولو لازم قوي إنك تستخدمي السشوار يبقى مرة في الشهر.

6- يا سلام بقى لو جربتِ إنك تشطفي شعرك بشوية خل بعد استخدام الشامبو وده لأن الخل بيساعد على التخلص من قشرة الشعر.

7- ياريت لو كنتِ بتعاني من القشرة إنك تستخدمي مشط خشب ويكون خاص بيكِ لوحدك علشان ماينتشرش قشر الشعر عند شخص آخر استعمل هذا المشط.

8- بعد تسريح الشعر ياريت إنك تغسلي المشط بماء جاري بس تكون المية سخنة.

*******************

وصفات سهله

دي شوية وصفات ممكن إنك تجربيها بجانب النصايح علشان تتخلصي من قشر الشعر بطريقة طبيعية، وعلى فكرة الوصفات دي مش بس بتساعد على التخلص من قشر الشعر، لأ دي كمان بترجع لشعرك حيويته ولمعانه اللي ممكن إنه يفقدهم بسبب قشر الشعر. بس كل الحكاية عايزة منك شوية صبر وعناية متتابعة لفترة معينة..

خلاصة الصبار

استخدمي خلاصة الصبار في تدليك فروة الرأس لمدة 15 دقيقة مرتين في الأسبوع، وبعد كده اغسلي شعرك.
وتكرار استخدام خلاصة الصبار هيقضي على القشرة ويمنع ظهورها تماما، ده بالإضافة إلى إنه بيساعد على نمو الشعر.

خل التفاح

ما عليكِ غير إنك تحضري خل التفاح، ودفيه عن طريق إنك تضعي الزجاجة اللي فيها خل التفاح في مية سخنة وبعد كده اشطفي بيه شعرك واتركيه لمدة ساعة وبعد كده اشطفي شعرك بالماء الدافئ.
كرري العملية دي مرة كل أسبوع وكمان ممكن إنك تستمري فيها حتى بعد اختفاء قشر الشعر لأن خل التفاح بيعطي للشعر رائحة حلوة.

السفرجل

والسفرجل ده بقى فاكهة مهمة قوي في القضاء على قشر الشعر.

تاخدي ملء معلقة صغيرة من مسحوق بذور ثمار السفرجل وحطيها في كوب مية باردة وغطيها لمدة 24 ساعة، بعد كده خدي المية بعد ما تصفيها وافركي بيها فروة الرأس لمدة نصف ساعة.. كرري هذه العملية يوميا عند الذهاب إلى النوم لمدة شهر، بس خلي بالك إن المنقوع ده يكون طازج يعني اليوم بيومه.

عرقسوس

من المعروف إن العرقسوس بيحتوي على مادة "الجليسريزين" والمادة دي معروفة بتقليلها للإفرازات الزيتية من فروة الرأس وطبعا إنت عارفة إن المحافظة على نسبة الإفرازات الدهنية منخفضة تؤدي إلى السيطرة على قشرة الرأس.

وطريقتها سهلة خالص.. كل اللي عليكِ إنك تاخدي شوية من مسحوق العرقسوس وتحطيها في حوالي مقدار لتر من خل التفاح في زجاجة مغطاة واستخدميه كغسول للشعر مرة واحدة في اليوم وهتشوفي النتيجة.

ودي كانت شوية نصايح للقضاء على القشرة، بس لو النصايح دي ماجابتش نتيجة ياريت إنك تستشيري دكتور أمراض جلدية.

يتبع

» كل اسم بنت له بيت من الشعر